கூகுளின் திறந்த​மூல எழுத்துரு

கூகுள் நிறுவனம் தனது எழுத்துருவான கூகுள் சான்ஸ் பிளெக்ஸ் எழுத்துருவை (Google Sans Flex) திறந்தமூல எழுத்துருவாக வெளியிட்டுள்ளது. இதுவரை கூகுள் தயாரிப்புகளுக்குள் மட்டுமே பயன்படுத்தப்பட்ட இந்த எழுத்துரு, தற்போது அனைவரும் இலவசமாக பயன்படுத்தக்கூடியதாக மாறியுள்ளது. இந்த முடிவு, எழுத்துரு வடிவமைப்பு, தொழில்நுட்ப உள்ளடக்க உலகில் ஒரு முக்கியமான மாற்றமாக பார்க்கப்படுகிறது.

கூகுள் சான்ஸ் பிளெக்ஸ்  என்பது வழக்கமான எழுத்துருக்களைப் போல அல்லாமல், ஒரே எழுத்துரு கோப்பில் பல வடிவங்களை மாற்றிக் கொள்ளும் வகையில் உருவாக்கப்பட்ட மாறும் எழுத்துரு ஆகும். எழுத்தின் தடிமன், அகலம், வாசிப்புக்கு ஏற்ற அளவு, சாய்வு, தெளிவு, வட்டத்தன்மை போன்ற கூறுகளை தேவைக்கேற்ப மாற்ற முடியும். இதனால் சிறிய திரைகள் முதல் பெரிய விளம்பரப் பலகைகள் வரை, ஒரே எழுத்துருவை பல சூழல்களில் பயன்படுத்த முடிகிறது. எழுத்துகள் தங்களைத் தாங்களே சூழ்நிலைக்கு ஏற்ப மாற்றிக் கொள்வதால், வாசிப்பும் தெளிவும் பாதிக்கப்படுவதில்லை.

இந்த எழுத்துருவை வடிவமைத்ததில் உலகப் புகழ்பெற்ற எழுத்துரு வடிவமைப்பாளர் டேவிட் பெர்லோ முக்கியமான பங்கு வகித்துள்ளார். இந்த எழுத்துரு, கூகுள் எழுத்துரு (Google Fonts) தளத்தின் மூலம் திறந்தமூல அனுமதியின் (SIL Open Font License) கீழ் வெளியிடப்பட்டுள்ளது. இதன் மூலம் தனிப்பட்ட பயன்பாடு மட்டுமல்லாமல் வணிக பயன்பாடுகளுக்கும் எந்தக் கட்டுப்பாடும் இன்றி இதைப் பயன்படுத்த முடியும்.

கூகுள் சான்ஸ் பிளெக்ஸ்  வடிவமைப்பாளர்களுக்கு பெரும் வாய்ப்புகளை வழங்குகிறது. ஏனெனில் ஒரே எழுத்துருவை வைத்து அமைதியான, மென்மையான தோற்றத்தையும், வலுவான, உறுதியான தோற்றத்தையும் உருவாக்க முடிவதால், வடிவமைப்பில் தேவையான உணர்வுகளை எளிதாக வெளிப்படுத்த முடிகிறது. கூகுள் மேற்கொண்ட ஆய்வுகளில், பல்வேறு எழுத்து வடிவங்களில் வாசகர்கள் காட்டிய எதிர்வினைகள் பதிவு செய்யப்பட்டுள்ளன. குறிப்பாக உயரமான, நுட்பமான எழுத்து வடிவங்கள் அதிகம் ஈர்ப்பை ஏற்படுத்தியதாக அந்த ஆய்வுகள் தெரிவிக்கின்றன. இது எழுத்துரு என்பது வெறும் காட்சிக்கான அம்சம் அல்ல, வாசகர்களின் அனுபவத்தையும் பாதிக்கும் ஒரு முக்கியக் கூறு என்பதைக் காட்டுகிறது.

கூகுள் சான்ஸ் பிளெக்ஸ்  நேரடியாக தமிழ் எழுத்துருவாக இல்லாவிட்டாலும், அதன் தொழில்நுட்ப அணுகுமுறை தமிழ் எழுத்துரு உலகிற்கும் ஒரு சிந்தனைத் திசையை காட்டுகிறது. தமிழ் எழுத்துகளில் சிறிய திரைகளில் வாசிப்புத் தெளிவு, தடிமன் மாற்றம், கல்வி, அரசு பயன்பாடுகளுக்கான தனித்த தோற்றம் போன்ற தேவைகள் தொடர்ந்து பேசப்பட்டு வருகின்றன.

மாறும் திரை அளவுகள், வாசிப்புத் தெளிவு, தொழில்முறை பயன்பாடு, பொதுமக்கள் பயன்பாடு ஆகிய அனைத்தையும் கருத்தில் கொண்டு உருவாக்கப்படும் எழுத்துருக்கள், ஒரு மொழியின் தொழில்நுட்ப எதிர்காலத்தை தீர்மானிக்கின்றன. அந்த வகையில், கூகுள் சான்ஸ் பிளெக்ஸ்  உலகளவில் ஆங்கில எழுத்துரு உலகிற்கு செய்யும் பணியை, தமிழ் மொழிக்காக முரசு அஞ்சல் நிறுவனம் செய்து வருகிறது. தொழில்நுட்ப வளர்ச்சி எந்த மொழிக்கும் தடையாக மாறக் கூடாது என்பதே இவ்வகை முயற்சிகளின் அடிப்படை நோக்கம்.

எழுத்துரு என்பது வெறும் எழுத்துகளின் வடிவம் அல்ல. அது தகவலை மக்களிடம் கொண்டு சேர்க்கும் பாலமாகும். அந்தப் பாலம் வலுவாகவும், தெளிவாகவும், காலத்திற்கேற்ப மாறிக்கொள்ளக் கூடியதாகவும் இருக்கும்போது தான், மொழியும் தொழில்நுட்பமும் ஒன்றாக வளர முடியும். அந்த பாதையில், உலகளாவிய முயற்சிகளும், முரசு அஞ்சல் போன்ற தமிழ் சார்ந்த நிறுவனங்களின் பங்களிப்பும், ஒரே திசையில் பயணம் செய்வதை இந்த மாற்றங்கள் வெளிப்படுத்துகின்றன.

• மு. இசக்கிமுத்து