காணொளி முகப்புப்படத்துக்கான எழுத்துரு

காணொளி முகப்புப்படத்தில் எழுத்துகள் என்பது வெறும் தகவல் சொல்லும் கருவி அல்ல. அவை பார்வையாளரின் கண்களை முதலில் பிடிக்கும் சக்தி கொண்டவை. ஒரு முகப்புப்படத்தை பார்க்கும் சில விநாடிகளில், அந்த காணொளி எதற்காக, யாருக்காக, எந்த மனநிலையுடன் உருவாக்கப்பட்டுள்ளது என்பதைக் குறிப்பது எழுத்துகள்தான். அதனால்தான் எந்த எழுத்துருவை தேர்வு செய்கிறோம் என்பதே அந்த முகப்புப்படத்தின் முழு தொனியையும் தீர்மானிக்கிறது.

சில காணொளிகள் நேரடியாகப் பேச வேண்டும். கூடுதல் அலங்காரம் இல்லாமல், கருத்தை தெளிவாக, உறுதியாகச் செல்ல வேண்டும். அப்படிப்பட்ட முகப்புப்படங்களில் தடித்த கோடுகளுடன், அலங்காரமற்ற எழுத்துகள் நல்ல தாக்கத்தை ஏற்படுத்துகின்றன. அவை செய்தியை ஒழுங்காகவும், நம்பகமாகவும் காட்டுகின்றன. தகவல் சார்ந்த காணொளிகள், விளக்க வீடியோக்கள் போன்றவற்றில் இந்த வகை எழுத்துருக்கள் அதிகம் பயன்படுத்தப்படுவது அதற்கான சான்று.

அதே நேரத்தில், எல்லா முகப்புப்படங்களும் கடுமையாகவும் நேர்த்தியாகவும் இருக்க வேண்டிய அவசியம் இல்லை. சில உள்ளடக்கங்கள் மென்மையான மனநிலையையும், தனிப்பட்ட அனுபவத்தையும் பேசுகின்றன. அப்போது சிறிய சாய்வு கொண்ட, பழைய திரைப்பட வசனங்களை நினைவூட்டும் எழுத்துருக்கள் ஒரு தனி உணர்வை உருவாக்குகின்றன. அவை நவீன திரைகளில் தெளிவாக வாசிக்கக்கூடியதாக இருப்பதோடு, உள்ளடக்கத்திற்கு ஒரு நெருக்கமான தன்மையையும் தருகின்றன.

இளம் பார்வையாளர்களை இலக்காகக் கொண்ட காணொளிகளில் எழுத்துரு ஒரு அலங்காரம் மட்டுமல்ல; அது உள்ளடக்கத்தின் ஒரு பகுதியாகவே மாறிவிடுகிறது. விளையாட்டுத்தனமான வளைவுகள், சித்திரக்கதை போன்று தோற்றமளிக்கும் தடித்த எழுத்துகள் முகப்புப்படத்தையே ஒரு கதையாக மாற்றுகின்றன. பார்வையாளரின் கவனம் தானாகவே அங்கு சென்று நிற்கும். அதனால்தான் இளம் வயதினருக்கான பல காணொளிகளில் எழுத்துகள் அதிக கவனம் ஈர்ப்பது போல இருப்பதை பார்க்க முடிகிறது.

சில நேரங்களில், அலங்காரம் இல்லாத எழுத்துகளே அதிகமாக நினைவில் நிற்கின்றன. தடித்த கோடுகள், வட்ட வடிவ அமைப்பு, சிறிய அளவிலும் தெளிவாகத் தெரியும் வடிவம் ஆகியவை முகப்புப்படத்தை எந்த கருவியிலும் ஒரே மாதிரி வலுவாக காட்டுகின்றன. குறிப்பாக திறன்பேசி திரைகளில், எழுத்துகள் மங்காமல், தனித்து நிற்பது மிகவும் முக்கியம். அந்த இடத்தில் இந்த வகை எழுத்துருக்கள் பெரிய உதவியாக இருக்கின்றன.

யூடியூப், சமூக ஊடகங்கள் போன்ற தளங்களில் முகப்புப்படம் என்பது ஒரு சிறிய செவ்வகம் மட்டுமே. ஆனால் அந்தச் சிறிய இடத்துக்குள் பெரிய பொறுப்பு உள்ளது. சில சொற்களால் முழு கருத்தையும் சொல்ல வேண்டும். அதே நேரத்தில் வாசிக்க எளிதாகவும் இருக்க வேண்டும். அகலம் குறைந்த, தடித்த எழுத்துகள் அந்த சமநிலையை உருவாக்க உதவுகின்றன. சிறிய இடத்திலும் அதிக தகவலைச் சொல்வதற்கான வழியை அவை தருகின்றன.

இறுதியாக, ஒரு நல்ல முகப்புப்படம் என்பது அழகுக்காக மட்டும் உருவாக்கப்படுவது அல்ல. அது பார்வையாளரை உள்ளே அழைக்கும் முதல் குரல். சரியான எழுத்துரு தேர்வு செய்தால், அந்தச் சிறிய முகப்புப்படமே ஒரு பெரிய வாய்ப்பாக மாறிவிடும்.

• மு. இசக்கிமுத்து