கருவிகளைத் தேடும் கடிகாரம்

கூகுள் நிறுவனம் தனது கருவிகளைத் தேடும் (Find Hub) செயலியை வியர் ஓஎஸ் (Wear OS) திறன்கடிகாரங்களுக்கு அறிமுகப்படுத்தியுள்ளது. இது தற்போது பிக்சல் கடிகாரத் தொடருக்கு அதிகாரப்பூர்வமாக வழங்கப்படுகிறது. இதன் மூலம் பயனர்கள் தங்கள் மணிக்கட்டிலிருந்தே தொலைந்த கருவிகளைக் கண்டுபிடிக்க முடியும்.

செயலி திறக்கும்போது, உங்கள் கூகுள் கணக்கில் இணைக்கப்பட்ட அனைத்து கருவிகளும் “My devices” பிரிவில் பட்டியலாகக் காட்டப்படும். திறன்பேசிகள், டேப்லெட்டுகள், காதணிபாடிகள் உள்ளிட்ட எந்தக் கருவியையும் தேர்வு செய்து அதன் இருப்பிடத்தைக் காணலாம்.

கருவியின் தற்போதைய மின்கலன் நிலை காட்டப்படுவதுடன், பல்வேறு செயல்பாடுகளும் வழங்கப்படுகின்றன. ஒலி ஒலிக்கச் செய்தல், வழிகாட்டல் பெறுதல், கருவியை பாதுகாத்தல், முழு அமைப்புகளையும் நீக்குதல் போன்ற விருப்பங்கள் உள்ளன.

உங்கள் திறன்பேசியை எங்கே வைத்தீர்கள் என மறந்துவிட்டால், திறன்கடிகாரத்தில் இருந்து ஒலி ஒலிக்கச் செய்யலாம். இது குறிப்பாக அவசர சூழ்நிலைகளில் மிகவும் உதவிகரமாக இருக்கும்.

தற்போதைக்கு இந்த அம்சம் பிக்சல் கடிகாரங்களுக்கு மட்டுமே கிடைக்கிறது. இருப்பினும், ஆண்டிராய்டு அத்தாரிட்டி இணையதளம், மற்ற வியர் ஓஎஸ் கருவிகளில் இதை sideload செய்தும் பயன்படுத்த முடியும் என உறுதி செய்துள்ளது. எதிர்காலத்தில் பிற வியர் ஓஎஸ் கருவிகளுக்கும் இது வழங்கப்படலாம்.

பிக்சல் கடிகாரப் பயனர்கள் கூகுள் ப்ளே ஸ்டோரில் “Find Hub” என தேடி செயலியை நிறுவலாம். உங்கள் கருவியில் வியர் ஓஎஸ் 6 புதுப்பிப்பு கிடைத்தால், அதையும் பதிவிறக்கம் செய்ய பரிந்துரைக்கப்படுகிறது. இணைக்கப்பட்ட மற்றொரு கருவியிலிருந்து கருவிகளைத் தேடும் வசதியை அணுகுவது மிகவும் எளிதானதாக இருக்கும்.

கூகுள் இந்த வசதியை படிப்படியாக விரிவுபடுத்தி வருகிறது.